Oton, Iloilo – Patay ang ginapahayag notorious nga kawatan sang natiruhan sa Oton, Iloilo.
Ini amo si Reymart Cinco alyas “Lupin” sang Barangay Talongadian, Sta. Barbara, Iloilo.
Sa interview sang Bombo Radyo kay Police Major Fernand Limbungan, hepe sang Oton Municipal Police Station, iya ginpahayag nga nasapwan nga wala na sang kabuhi si Cinco sa Circumferential Road, Brgy. Pulo Maestra Vita, Oton, Iloilo nga may igo sa ulo.
Suno kay Limbungan, si Cinco ang kilala man bilang hangkilan nga kawatan sa probinsya sang Iloilo bangud sa mga lugar nga iya man masami ginkawatan ilabi na sa banwa sang Pavia, Sta. Barbara kag San Miguel.
Samtang, ginpahayag sang natungdan nga may narekord man sang insidente sang pagpangawat sa Mandurriao sang Disyembre 2022 kag ginatumod kahimuan ni Cinco.
Narekober naman sa insidente ang basiyo sang .45 caliber nga armas luthang.
Nagapadayon naman ang imbestigasyon sang Oton Municipal Station kun sin o nagpatay kay Cinco.
