ILOILO CITY – Ginpasiguro sang Kapisanan ng mga Brodkaster ng Pilipinas (KBP) ang pagduso sang responsible journalism sa tunga sang paglapta sang mga fake news.
Kadungan sang pagsugod sang iya bag-o nga termino bilang national president sang KBP, ginpahayag ni Mr. Herman Basbaño, Vice President kag Chief Operating Officer for AM Division sang Bombo Radyo Philippines, mainstream media man ukon social media, ang dapat mangin responsable sa ginapaguwa nga impormasyon sa publiko.
Ini ang kinalain suno kay Bombo Herman sang mainstream media kun sa diin may ginasunod nga rules kag ginapasiguro nga husto ang ginahatag nga impormasyon sa publiko.
Magluwas sini, ginapasiguro man sang KBP suno kay Basbaño nga may ginasunod nga sistema kaangay sang Broadcast Code nga nagaserbe nga giya sa mga media practitioners kag mahimo ang mga ini mapasabat sa ti-on nga may mahimo nga kapaltahan.
Gindugang pa ni Bombo Herman, indi mahimo nga abusaran ang mga bag-o nga teknolohiya.
Magluwas sa pagpakigbato sa fake news, ginpasiguro man ni Bombo Herman nga magapadayon ang mga programa sang KBP para sa responsable nga pagpalayag sang mga balita kag impormasyon, kag iba pa nga adbokasya kaangay sang pagtatap sang palibot kag pagbulig sa mga ahensiya sang gobyerno para sa kampanya batok sa human trafficking.