Gin-engganyo ni World no. 4 Coco Gauff ang Filipino fans nga padayunon ang pagsuporta kay Alex Eala nga suno sa iya nagdala sang bag-o nga “demographic” sa tennis.
Kabahin ini sang sabat sang two-time Grand Slam Champion sa interview sa Women’s Tennis Association (WTA) matapos ginlutos si Eala sa quarterfinal round sang Dubai tennis championships, 6-2, 6-0.
Gintawag man ni Gauff ang audience nga “home crowd” bangud sa tuman ka damo nga mga Pilipino nga nagsuporta sa world no. 47 — nga kaangay man sa natabo sa nauna nga mga hampang sini indi lamang sa Dubai kundi mangin sa Australian Open kag sa iban pa nga pungsod.
“I’d like to thank Alex for bringing a new demographic to the sport. I really appreciate. I think it’s great. I know sometimes, it’s tough when you are playing against a home crowd, but I think that it’s great for the sports so keep being enthusiastic and keep rooting for your player,” mensahe ni Gauff pagkatapos sang hampang nga ginpalakpakan naman sang Filipino fans.
“Alex is a tough competitor and even when I was up, I knew that she could come back at any given moment. I’ve seen her do it before so thank you guys for coming out here,” kabahin pa sang iya post-match interview.
Antes ang ila pag-atubangay ni Alex sa quarterfinal clash subong nga gab-i, nag-viral man video ni Gauff nga nag-sorry sa audience sa Dubai bangud naglawig ang iya hampang kag nadugayan sila sa paghulat sa Pinay tennis star. Nagpasalamat man ini sa Filipino tennis fans nga nagpalakpak kag nag-cheer para sa iya samtang wala pa si Alex sa court.
Abante na si Gauff sa semifinals kun sa diin posible nga atubangon sini si world no. 67 Antonia Ruzic ukon si world No. 9 Elina Svitolina.
Ang Dubai Tennis Championships amo naman ang ikaanum nga tournament ni Eala subong nga tuig.#
