Dungog para kay Kelly Williams nga makaupod sa Gilas Pilipinas para sa sixth window sang Fiba World Cup Asian Qualifiers subong nga bulan.
Sorpresa nga ginlakip si Williams sa national team matapos ginkumpirma nga indi makaintra sanday Japeth Aguilar kag naturalized player Ange Kouame bangud sa injuries. Wala man sa team si Kai Sotto.
“I’m grateful that my talents and my abilities are being appreciated. Since I’ve been here, a lot of emphasis is put on how old a player is despite how effective he is playing,” pahayag ni Williams.
Sang nagligad nga tuig, yara man si Williams sa second window sang qualifiers nga amo ang iya una nga Gilas duty sa isa ka major competition halin sang 2011 Fiba Asia Championship sa Wuhan, China.
Ulihi nga hampang ni Williams amo ang pagbulig sa TNT Tropang Giga nga magdaog batok sa Blackwater Bossing sa PBA Governors’ Cup kahapon.
Sa edad nga 41 anyos, si Williams ang pinakatigulang nga player sa team sang Gilas Pilipinas nga magabunggo batok sa Lebanon kag Jordan subong nga Pebrero. ##
