Nagapati ang isa ka abogado nga malapit na gid lang ma-acquit si opposition Senator Leila De Lima sa drug allegations nga ginpang-file batok sa iya.
Kasunod ini sang pagbawi sang self-confessed drug lord nga si Kerwin Espinosa sa iya ginpangbuy-an nga mga pahayag batok kay De Lima sang nagligad nga senate hearing.
Sa counter-affidavit ni Espinosa nga gin-file sa Department of Justice (DOJ), ginpahayag sini nga indi matuod ang iya una nga sworn statements sa Senate joint committee hearings bangud gin-alegar sini nga napilitan siya nga i-duot si De Lima bangud ginpuwersa siya, gin-pressure, gin-intimidate, kag ginpahog sang mga pulis.
Sa interview sang Bombo Radyo kay Atty. Joenar Pueblo, Bombo Abogado kag political law professor sa University of San Agustin College of Law, iya ginpahayag nga daku nga risgo ang ginhimo ni Espinosa sa paglain sang iya pahayag bangud posible pa nga ipapatay ini sang mga naga-kontra kay De Lima.
Posible man suno sa abogado nga wala na nahadlok si Espinosa bangud manugtakop na ang termino ni Presidente Rodrigo Duterte kag madulaan na ini sang gahum.
Daku naman suno kay Pueblo ang mabulig sini sa kaso batok sa opposition senator nga madugay naman nga gindingutan sang iya kinamatarong sa speedy trial sa korte.
Ang balantayan pa gid nga bahin suno kay Pueblo amo ang masunod nga himuon ni De Lima kun halimbawa ma-acquit na ini sa kaso kag indi naman presidente si Duterte.
Nahibaluan nga si De Lima amo ang nagpanguna sa Senate inquiry sa gina-alegar extrajudicial killings sa war on drugs sang Duterte administration apang ginpreso siya halin sang 2017.
Sa tatlo ka kaso nga ginpasaka batok kay De Lima, isa ang gin-dismiss sang Muntinlupa court.Madamo nga mga grupo lakip na ang ASEAN Parliamentarians for Human Rights ang nagapanawagan nga paguwaon ang senador bangud ginapahayag nga maathag nga “politically motivated” ang rason sang iya detainment. ##
