OTON, ILOILO – Nagdepensa ang anay punong barangay kag subong barangay kagawad sang Poblacion East, Oton, Iloilo may kaangtanan sa audit observation memorandum nga ginserbe sang Commission on Audit.
Sa interview sang Bombo Radyo kay Kagawad Fernando Mediodia, iya ginpahayag nga 2007 tubtob 2018 siya nagpungko bilang punong barangay.
Suno kay Mediodia, wala ma audit sang ahensya ang ila nga barangay sang tuig 2015 tubtob 2018 sa diin gintumod sang Commission on Audit nga wala sang physical inventory nga natabo sa P1 million nga balor sang proper plant equipment.
Sigurado ang anay punong barangay nga yara ang tanan nga mga liquidation sang pondo.
Sa audit observation memorandum, may yara sang P240,000 nga pondo nga wala ma liquidate apang pahayag niya, mahimo wala lang makita sang Commission on Audit ang ila liquidation bangud may yara ang barangay sang voucher.
Gin-ako man sang natungdan nga naglain ang iya buot kay Punong Barangay Reynaldo Vargas Jr. bangud daw kaangay nga ginpakahuy-an siya sa session nga ginpatigayon sa diin yara ang iban nga mga opisyales.
Kuntani suno kay Mediodia, gin-istorya na lang siya personal sang incumbent punong barangay may kaangtanan sa audit observation memorandum bangud sa pagkamatuod Disyembre 2019 pa ginhatag ang amo nga memorandum apang sang Mayo 29, 2020 lang niya ini ginpahibalo.
