ILOILO CITY – Nagtaliwan na sa edad nga 73 ang presidente sang United Arab Emirates nga si Sheikh Khalifa bin Zayed Al Nahyan.
Si Sheikh Khalifa ang nagsuprer sang stroke kag nagpaidalom sa surgery sang 2014 kag bangud sadto, ang iya utod nga lalaki nga amo crown prince sang Abu Dhabi ang nangin de-facto leader sang UAE.
Bangud sang kamatayon ni Sheikh Khalifa, gin-anunsiyo sang Ministry of Presidential Affairs nga sa sulod sang 40 ka adlaw, ang tanan nga mga flag ang naka-half-mast kag ginsuspendir ang trabaho sa ministries, departments, federal kag local institutions kag sa mga private sectors sa sulod sang tatlo ka adlaw nga nagsugod na kahapon, Byernes.
Si Sheikh Khalifa ang gin-appoint nga ikaduha nga presidente sang UAE sang 2004 nga nagbulos sa iya amay nga si Sheikh Zayed al Nahyan.
Antes nangin presidente, siya ang nangin crown prince sang pungsod kag lider sang Supreme Petroleum Council sang pungsod.
Sang nangin presidente na ini, ginpamunuan niya ang pinakadako nga investment fund sa kalibutan nga amo ang Abu Dhabi Investment Authority nga nag-angkon sang binilyon ka dolyar nga asset.
Ang isa man sa pinakamataas nga building sa kalibutan nga Burj Khalifa ang ginkuha man sa iya pangalan pagkatapos nga nabayaran sang UAE ang utang sini sa Dubai kag bilang isa ka sports fan, ginsuportahan niya ang pagtukod sang English Premier League soccer club nga Manchester City.
