ILOILO CITY – Ginsentensyahan sang kamatayon ang kilala nga rapper sa Iran nga si Toomaj Salehi bangud sa iya involvement sa lapnagon nga protesta sa amo nga pungsod sang 2022.
Una diri, gin- aresto ang rapper kag ginpreso sa solitary confinement kag gin- alegar nga gin- torture pa ini.
Sa wala ginlauman nga tikang, ginbaliskad sang korte sa Isfahan ang desisyon sang Supreme Court sa kaso ni Saleh kag gin- isyu ang maximum punishment sang kamatayon.
Suno sa state media, ang sentensiya ni Salehi ang subject pa nga mapanubuan sang pardoning committee kun mag- apelar ini.
Ang 32 anyos nga si Salehi ang nangin critical sang Iranian regime kag hayagan nga nagapamatok sa gobyerno paagi sa iya lyrics sang kanta sa social media.
Matandaan nga nangin mainit ang mga demonstrasyon sa Iran kasunod sang kamatayon sang 22-anyos nga si Mahsa Amini, nga ginadudahan nga napatay samtang yara ini sa kustodiya sang kapulisan.
Ginkondenar naman sang United States’ Office of the Special Envoy for Iran ang death sentence nga gindagdag batok kay Salehi kag gintawag ini nga brutal nga pag- abuso sang rehimen sa iya pumuluyo, pagsikway sa tawhanon nga kinamatarung kag pagpugong sa demokratiko nga pagbag-o nga ginahandom sang mga Iranian.
