Opisyal na nga nagpungko ang pinakauna nga babaye nga nangin commanding officer sang male-dominated 3rd Field Artillery Battalion (FAB) sa Rehiyon 6 kag Rehiyon 7.
Ini amo si Lt. Col. Deborah Castillo sang 3rd Infantry Division sang Philippine Army nga amo ang nag-gradwar sa Philippine Military Academy Class of 1994.
Ginsuguran ni Castillo ang iya active military service bilang isa ka artillery officer 24 na ka tuig ang nakaligad.
Siya man ang nangin platoon leader kag nagserbe bilang Battery commander sang all-male unit sa Mindanao.
Bag-o pa ang iya present assignment, nagserbe man ini bilang Executive Officer sang 3FAB lakip na ang Gender and Development Focal Point kag Army Transformation.
Nangin instructor kag researcher man ini sa nagkalain-lain nga Philippine Army training institutions kag sa Department of National Defense.
Si Castillo ang isa man ka military observer sa United Nations Peacekeeping Mission, sa diin siya ang napili-an bilang chief of operation sang ila Chief of Mission.
Sa interview sang Bombo Radyo kay Castillo, iya ginpahayag nga ini ang pinakauna nga tion nga isa ka babaye nga opisyal ang gin-assign sa amo nga posisyon.
Suno sa iya, ini ang living testimony sang gender equality.
Ang ini nga bag-o nga posisyon para kay Castillo ang pamaagi agud nga iya ma-promote kag mapakigbahin ang iya panindugan sa equality sa tunga sang mga lalaki kag babayi sa sosyudad.
Nangin pagpanghangkat naman para kay Castillo nga iya malumpawasan ang physical limitations sa mga tyempo nga yara pa ini sa training.
Isa man ka dako nga challenge para sa iya ang transformation sang iya kaugalingon bilang isa ka sibilyan sa isa ka myembro sang militar.
