Gindayaw ni North Korean leader Kim Jong Un ang mga soldado sang ila pungsod nga nangin maisog suno sa iya sa pagpakig-away para sa Russia.
Kadungan ini sang pagbisita ni Kim sa memorial site kun sa diin ginpanglubong ang mga soldado nga napatay sa giyera.
Suno sa North Korean leader, wala sang tupong ang kaisog kag pagkabaganihan sang Korean People’s Army nga involved sa overseas military operations.
Apisar nga wala namensyonar ang Russia sa report sang state media nga Korean Central News Agency (KCNA), nauna na nga nagpasalig si Kim nga padayunon sini ang suporta sa tanan nga polisa kag desisyon ni Russian President Vladimir Putin.
Matandaan nga mas ginpadalom pa sang North Korea ang relasyon sini sa Russia halin sang gin-invade sang Moscow ang Ukraine sang Pebrero 2022.
Linibo ka mga soldado ang ila ginpadala agud magbulig sa Russia sa gyera suno sa South Korean kag Western intelligence agencies. Sandig pa sa reports sang Seoul, 600 ka mga North Korean soldier ang napatay kag linibo ang napilasan bangud sa ila pag-intra sa gyera.
Magluwas sa pagpadala sang tropa, nagapadala man ang Pyongyang sang artillery shells, missiles kag long-range rocket systems nga ginabayluhan naman sang Russia sang financial aid, military technology kag food and energy supplies.
