ILOILO CITY – Sa syudad sang Iloilo ginbakal ang 29 ka karton sang makahulubog nga ilimnon nga nakuha sa isa ka pulis nga nagtuyo nga magpalusot sa checkpoint sa Brgy. Cabuago Sur, Sta. Barbara, Iloilo.
Sa interview sang Bombo Radyo kay Police Major Reymond Celoso, hepe sang Sta. Barbara Municipal Police Station, iya ginpahayag nga mahimo nga ibaligya sang pulis ang kinarton nga whisky nga iya ginbakal sa Muelle Loney.
Suno kay Celoso, nagaserbe nga driver sang salakyan amo si Police Staff Seargeant Paul Pinggoy nga na-assign sa Regional Intelligence Division sang Police Regional Office 6, samtang kaupod naman niya ang sibilyan nga si Adolfo Patiam Jr.
Ginpahayag ni Celoso nga ginahulat na lang ang pagpatigayon sang inquest proceedings batok sa nasambit nga pulis nga una nga nagbalibad nga tiles lamang ang karga sang iya salakyan.
