Nagnubo ang kita sang Pilipinas kun sektor sang turismo ang pagahambalan.
Suno kay Virginia Messina, senior vice president sang World Travel and Tourism Council (WTTC), humalin sang nagligad nga tuig, nagnubo sa 37 billion dollars ukon P1.7 trillion ang kontribusyon sang turismo sa ekonomiya sang pungsod.
Sa data sang WTTC, nagsarurot man ang gross domestic product (GDP) sang turismo sang Pilipinas sa 41.4 percent bangud sang COVID-19 pandemic.
Pahayag ni Messina, bangud man sini, nagtuga sang tuman kadako nga halit sa socioeconomic sang pungsod ang pag-untat sang kapin 2 million nga mga trabaho, travel kag turismo.
Apang sa pihak sini, ginalauman nga magsaka sa 48.5 percent ang kontribusyon sang industriya sang turismo sa ekonomiya sang pungsod subong nga tuig, sa tion nga magpadayon ang mobility kag international travel.
