ILOILO CITY – Tuman ka apektado ang palangabuhi-an sang manugpinta sang lapida bangud sa COVID-19 pandemic.
Sa interview sang Bombo Radyo kay Efemia Bilbao, manugsumbra sa syudad sang Iloilo, iya ginpahayag nga kun sang una, indi magnubo sa P500 ang iya kita sa sulod sang isa ka adlaw apang sa subong, swerte na kun may yara siya sang P300 nga kita.
Suno kay Bilbao, magluwas sa pagpangabudlay, sila man mismo ang nagabakal sang brush kag pinta nga ila ginagamit kag ini ang igabuhin pa sa ila nga kinitaan.
Ginpahayag ni Bilbao nga tuman ka gamay na lang ang numero sang mga nagapadulong sa patyo bangud sa kahangawa nga dala sang virus.
Nahibalu-an nga ginmandu sang Iloilo City Government ang pagpasirado sang tanan nga patyo umpisa Oktubre 30 tubtub Nobyembre 2 bilang pagsunod sa panugyan sang national government.
