ILOILO CITY – Naga-amat-amat na saka ang kita sang Iloilo City Government sa pila ka adlaw nga pagpatuman sang ‘Paid Parking Ordinance’ sa pila ka mga lugar sa Iloilo City Proper.
Ang implementation sang ordinansa ang nagsugod sang Lunes, Mayo 15 nga nagasakup sa mga dalanon sa syudad nga ginalakipan sang Aldeguer, Arroyo, Arsenal, Solis, Peralta, Guanco, kag porsyon sang Ortis Street.
Sa interview sang Bombo Radyo kay Mr. Jeck Conlu, pinuno sang Iloilo City Public Safety and Transportation Management Office, iya ginpahayag nga sang Lunes, P7, 000 ang nakolekta sang syudad samtang subong nga adlaw, nagdangat na sa P12, 000.
Suno kay Conlu, sa una nga adlaw sang implementasyon, madamo pa sang wala nagasunod apang ginapa-intindi lamang sang personnel sang Local Economic and Enterprise Office.
Sa subong suno kay Conlu, amat-amat na nga naintindihan sang publiko ang amo nga ordinansa.
Magluwas sa City Proper, may yara man sang mga lugar sa iban nga distrito nga ginpaidalom sa survey kag posible nga ipaidalom man sa paid parking.
Samtang, sa mga private parking areas, wala sang existing ordinance ang syudad nga naga-regulate sa ila apang suno kay Conlu, dapat nga may yara lang sila sang permit.
