Yara sa 1.1 million learners ang magabalik-eskwela sa Hunyo 16, 2025 nga nagahalin sa isla sang Panay kag Guimaras ukon Western Visayas.
Ini kasunod man sang opisyal nga pag-anunsyo sang Department of Education (DepEd) nga ang mga pampubliko nga eskwelahan sa bilog nga pungsod magabukas sang klase sa Hunyo 16, para sa School Year 2025–2026.
Ini nga pagbalik amo ang pagsunod sa pre-pandemic school calendar, base sa DepEd Order No. 12, Series of 2025.
Sa interview sang Bombo Radyo kay Mr. Hernani Escullar Jr., Spokesperson sang Department of Education Region VI, iya ginpahayag nga ang school year magatapos sa Marso 31, 2026 kag magalawig sang 197 ka adlaw ang klase, lakip na ang End-of-School-Year (EOSY) rites.
Suno kay Escullar, posible pa ini magbag-o depende sa mga indi mapunggan nga hitabo ukon dugang nga mga mando sa palaabuton.
Dugang sini nga apisar nga opisyal nag nagseparar na ang Negros Occidental sa rehiyon, makabig sa gihapon nga madamo ang mga maga-eskwela nga estudyante.
Ang enrollment kag Brigada Eskwela patigayunon halin Hunyo 9 tubtob 13, isa ka semana antes opisyal nga magsugod ang klase.
Pagpaathag ni Escullar, ini nga desisyon nagsunod sa pag-aprubar ni President Ferdinand “Bongbong” Marcos Jr. sang Mayo sang nagligad nga tuig nga ibalik sa tradisyonal nga Hunyo tubtob Marso ang school calendar — nga amo ang nakasanayan sang madamo nga manunudlo, ginikanan, kag mga estudyante antes pa nagbag-o bangod sang pandemya.
