POHANG, SOUTH KOREA – Ginatudlo rason sang pagdamo sang kaso sang Coronavirus Disease 2019 sa Pohang City, North Gyeongsang, South Korea amo ang maestra nga nagtambong sa prayer session sa Shincheonji Church of Jesus sa Daegu City.
Sa interview sang Bombo Radyo kay Ms. Janice, manunudlo sa South Korea, iya ginpahayag nga ang babaye ang tumandok sang Pohang kag nagpadulong lang sa Daegu City agud nga magtambong sang prayer session sa diin na rekord ang una nga kaso sang COVID-19 sa South Korea.
Suno kay Janice, pagbalik sang babaye sa Pohang City, naglagaw ini humalin Pebrero 17 tubtob Pebrero 20 bangud siya mismo ang wala nakatalupangod nga positibo na siya sa nasambit nga virus.
Pebrero 21 na pahayag sang natungdan sang natukiban nga positibo ang babaye sa COVID-19.
Bangud sini, ginsapubliko sang local media agency sa South Korea ang mga lugar nga ginpadulungan sang babaye kag ginpanugyanan ang publiko nga likawan ang mga ini agud indi maglapta ang virus.
Apang bangud pila man ka adlaw nga naglibot sa Pohang City ang infected nga babaye, madasig ang paglaton sang virus sa iban nga tawo nga gintunaan sang 11 ka mga na rekord nga nag positibo sa coronavirus disease sa lugar.
May mga nabaton man nga emergency alert ang mga tawo sa ila nga cellphone sa diin ginapaalinton ang mga ini nga maglikaw sa mga posible lugar nga ginpangkadtoan sang mga nagpositibo sa COVID-19.
Samtang ginpostpone naman ang pagbukas sang klase sa South Korea nga natalana kuntani sa Marso 2 bangud sa nagataas nga kaso sang coronavirus disease.
Sa pangkabug-osan may yara na sang 1,595 ka mga kumpirmado nga kaso sang coronavirus disease kag 13 na ang patay nga na rekord sa bug-os nga South Korea.
Sa subong, ginatinguhaan sang lokal nga mga otoridad ang pag disinfect sang mga pampubliko nga lugar amo man sa mga estabilisemento kaangay sang eskwelahan agud nga ma untat na ang paglapta sang virus sa South Korea.
