JAPAN – Ginpauntat na ang klase sa tanan nga eskwelahan sa Japan bangud sa Coronavirus Disease 2019 (COVID-19).
Suno kay Bombo International Correspondent Josel Palma, mismo si Prime Minister Shinzo Abe ang nagpanawagan nga ipauntat na ang klase agud nga indi magdamo ang pasyente nga nagpositibo sa nasambit nga virus.
Ginpahayag ni Palma nga umpisa Marso 2, wala na sang klase halin sa Kindergarten tubtub sa Senior High School, magluwas sa Kanazawa City sa Ishikawa Prefecture.
Sa pagpaathag ni Palma, wala nagsunod sa nasambit nga mandu ang alkalde sang Kanazawa City bangud sa pagpati nga mangin tuman ka daku ang epekto sini sa ekonomiya sang lugar.
Ginduso man ni Abe sa Japanese Government nga magtipon sang pondo agud nga ibulig ilabi na sa working professionals nga naapektuhan sang pagpauntat sang trabaho.
Sa subong, istrikto nga ginapanugyan sang Japanese Government ang pagsuksok sang facemask, paggamit sang sanitizers, masami nga pag-inom sang madamo nga tubig kag kun mahimo, indi anay magpadulong sa pampubliko nga lugar.
Sa pinaka-ulihi nga data, naglab-ot na sa 966 ang kaso sang Coronavirus Disease sa Japan.
