CANADA – Plano sang gobyerno sang Canada nga indi anay pag-ibalik ang klase subong nga tuig sa nasambit nga pungsod bangud sa padayon nga pagpamahog sang Coronavirus Disease 2019 (COVID-19).
Sa report ni Bombo International Correspondent Nowell Relatos direkta sa Canada, iya ginpahayag nga sa Setyembre na kuntani mabukas ang klase sa Canada apang indi pa ini masiguro bangud indi pa mahambal nga hilway na ang pungsod sa COVID-19 sa amo nga bulan.
Suno kay Relatos, sa siyam ka mga probinsya kag tatlo ka teritoryo sa Canada, ang Quebec lamang ang nag umpisa bukas sang klase sang Mayo 11 nga sa pagkamatuod ang nasambit nga lugar ang may masobra 50 porsiento ka mga COVID-19 cases kag casualty sa Canada.
Apang na meet man sang Quebec ang kwalipikasyon sang World Health Organization antes sila nagbukas sang establisimento komersyal kag nagbalik sang klase.
Sa iban nga bahin sang mga lugar sa Canada pahayag niya, apisar nga na meet nila ang standards sang WHO, indi nila luyag nga risguhon ang ikaayong lawas sang ila mga kabataan.
Lubos nga gina-engganyo sa Canada amo ang online learning apang indi man ini required sang gobyerno bangud ang iban ang indi man sarang nga magbayad sang internet kag wala man sang gamit kaangay sang laptop ukon computer.
Sa subong, may yara na sang 80,142 ka mga kaso sang COVID-19 sa Canada, 40,776 ang naka recover kag 6,031 ang patay.
