ILOILO CITY – Kanselado ang klase halin sa Pre-School tubtub Senior High School sa syudad sang Iloilo.
Ini matapos nga nalakip ang Iloilo City sa mga lugar nga yara sa Storm Warning Signal no. 2 bangud sa Bagyo Tisoy.
Sa interview sang Bombo Radyo kay Iloilo City Mayor Jerry Treñas, iya ginpahayag nga kun may Storm Warning Signal no. 2, automatic nga wala sang klase sa Pre-School tubtub Senior High School.
Suno kay Treñas, 24/7 nga bukas ang emergency operation center para sa monitoring sang lakat sang panahon.
Ginpahayag ni Treñas nga bangud wala nadayon ang Memorandum of Agreement sa tunga sang Iloilo City Government kag Office of Civil Defense, may yara sang identified evacuation center ang tagsa ka barangay.
Ang mga nagapuyo sa high risk barangay ang ginpandaman nga mag-aligmat sa posible baha nga ituga sang bagyo.
