Suspendido ang klase sa tanan nga lebel sa bilog nga Western Visayas subong nga adlaw, Nobyembre 10, tubtub buwas, Nobyembre 11.
Ini ang kasunod sang Memorandum Circular No. 106 nga ginpaguwa sang Malacañang kahapon sang aga kasunod sang rekomendasyon sang National Disaster Risk Reduction and Management Council (NDRRMC).
Pirmado ini ni Executive Secretary Lucas Bersamin kasunod sang otoridad nga ginhatag ni President Ferdinand R. Marcos Jr.
Epektibo man ang kaangay nga order para sa National Capital Region (NCR), Cordillera Administrative Region (CAR), Regions I, II, III, IV-A, IV-B, V, VII, VIII, kag sa Negros Island Region.
Subong nga adlaw, suspendido man ang trabaho sa government offices sa NCR, CAR, kag sa mga rehiyon sang Ilocos, Cagayan Valley, Central Luzon, Southern Tagalog, MIMAROPA, Bicol kag Eastern Visayas.
Ini nga tikang sang presidente ang ginhimo sa tunga sang gina-antisipar nga halit nga dal-on ni Super Typhoon Uwan.
Nakabutang man sa memorandum nga dapat magpadayon sa operasyon ang mga ahensya sang gobyerno nga responsable para sa basic, vital kag health services, preparedness, kag response duties.
Sa pihak nga bahin, yara naman sa discretion sang tagsa ka management kun i-suspend ang trabaho sa mga pribado nga mga kumpaniya.
