Gin-guba sang Filipina-American nga si Kristina Knott ang iya kaugalingon nga national record sang nagpangibabaw ini sa women’s 100m sa Philippine Athletics Championships sa PhilSports Track Oval sa Pasig.
Nagdangat lamang sa 11.2 segundos ang time kay Knott nga mas madasig sa 11.27 mark sini nga na-set sa Drake Blue Oval Meet sa United States sang 2020.
Buot silingon sini, mas nagahilapit na ini sa qualifying standard para sa Paris Olympics. Agud makakuha sang Olympic spot sa women’s 100m, kinahanglan sini malab-ot ang qualifying standard nga 11.07 seconds.
Isa ka Tokyo Olympian si Knott kag nagalaum man nga makasulod sa women’s 200m sa Paris.
Padayunon sang 28-anyos nga sprinter ang iya paglagas sa Olympic spot paagi sa pagpasakop sa mga kumpetisyon sa Espanya.
