ILOILO – Indi sarang makarekomenda ang Provincial Disaster Risk Reduction and Management Office (PDRRMO) sa Sangguniang Panlalawigan nga ipaidalom sa state of calamity ang pila ka mga banwa sa probinsya sang Iloilo kun indi pa kompleto ang data kasunod sa paglaslas sang Bagyo Ursula.
Sa interview sang Bombo Radyo kay Dr. Jerry Bionat, pinuno sang PDRRMO, iya ginpahayag nga subong nga hapon, ginalauman nga maabat na ang reports sang mga risk reduction and management offices sa Quinto Distrito.
Suno kay Bionat, kahapon, ginsapol ni Governor Arthur Defensor Jr. ang lead agencies kaangay sang Agriculture, Engineering, Health, Social Welfare and Development, General Services kag Disaster Risk Reduction and Management.
Ginpahayag ni Bionat nga sa subong, lima pa lang ka banwa ang nakadeklarar sang state of calamity nga ginalakipan sang Carles, Estancia, Balasan, Batad kag Concepcion.
Mas maayo suno sa natungdan kun may yara sang deklarasyon halin sa Sangguniang Panlalawigan agud may yara sang dugang nga bulig kag mitigating measures nga mapalab-ot ang Iloilo Provincial Governemnt.
ON CATEGORIZATION.
Samtang, ginpaathag naman ni Bionat kun ano ang mga categorization sang kalamidad nga iya natun-an sa University of Sydney sa Australia.
Suno kay Bionat, kun 1-10 percent ang apektado, buot silingon, napaidalom sa INCIDENT ang isa ka banwa; kun manubo sa15 percent, ginatawag ini nga DISASTER; samtang, kun maosbra sa 15 percent, ginatawag na ini nga STATE OF CALAMITY.
Kun kaangay sang natabo sa Bagyo Frank sa diin halos bilog na nga probinsya ang apektado ukon 99% sang mga pumuluyo, ginatawag ini nga STATE OF CATASTROPHE, apang sa subong, tubtob sa STATE OF CALAMITY gid lamang ang ginasunod sa pungsod Pilipinas.
DUGANG NGA EQUIPMENT.
Kaangot naman sa paghatag sang Iloilo Provincial Government sang prayoridad sa hand-held radio, ginpahayag ni Bionat nga sa subong, pililion lamang nga banwa ang may yara sang nagagana nga mga radyo.
Ini amo ang banwa sang Miag-ao, Alimodian, New Lucena, Cabatuan, Calinog, Janiuay, Lambuano, Barotac Nuevo, Dueñas, Dumangas, Concepcion, Lemery kag Maasin.
Kasunod diri, ginpahayag ni Bionat nga dapat nga hatagan sang tag-isa nga hand-held radio ang mga municipal disaster risk reduction and management officers agud mapauswag pa ang rescue kag retrieval operations.
