ILOILO — Gintapungol kag ginkuga sang konduktor sang jeep ang driver sang ceres bus sa dalan sa Barangay Inagdangan Norte, Zarraga, Iloilo, matapos nga gin-cut sang jeep ang ceres.
Ang nagtapungol amo si Alberto Sutio, konduktor sang jeep, residente sang Brgy. Pandan, Dingle, Iloilo; samtang ang driver sang ceres amo si Silverio Cortez, residente sang Poblacion Ilaya, Dumarao, Capiz.
Sa interview sang Bombo Radyo kay Police Senior Staff Sergeant Ivan Christian Saludares, imbestigador sang Zarraga Municipal Police Station, iya ginpahayag nga sang gin-cut sang jeep ang ceres, nagbusina ang ceres sa jeep, rason nga naakig ang konduktor sini.
Suno kay Saludares, nagpondo ang jeep agud balabagan ang ceres sa dalan, sa diin, nagka-oportunidad ang konduktor sang jeep agud makapanaog kag makasaka sa ceres bus.
Ginpahayag man ni Saludares nga dala ang balakol, ginpilit nga sudlon sang konduktor sang jeep ang ceres apisar nga nakasirado ang pwerta sini, rason man nga naguba ini.
Didto na kag naglab-otanay ang duha nga nangin rason man sa pagka-agum sang pilas sang driver sang ceres.
Nagtuyo naman nga magpugong ang konduktor sang ceres sa duha, apang natumba man ini kag nakaagum sang pilas.
Tuyo naman nga magpadulong ang driver kag konduktor sang jeep sa opisina sang ceres bus agud magpangayo sang pasaylo kasunod sang natabo nga insidente.
Nahibaluan nga ang jeep ang nagabyahe halin sa banwa sang Dingle padulong sa Tagbak Terminal, vice versa.
