Nagpa-Bombo ang isa ka Public Assistant Officer (PAO) sang Iloilo City Alliance Operators and Drivers Transport Cooperative matapos nga wala mahatag ang sweldo sini.
Sa interview sang Bombo Radyo kay Alyas John, konduktor, iya ginpahayag nga nagalab-ot na sa P400 tubtob P800 ang income niya sa isa ka adlaw.
Suno kay Alyas John, sa una nga duha ka bulan niya nga pagtrabaho sa amo nga kooperatiba, wala man siya sang problema nga nakit-an.
Ginbuyagyag man sini nagsugod ang problema sang nagsugod man delay sa pagpasweldo ang kooperatiba, kon sa diin, may mga bes nga nagalapaw sa adlaw mismo sang sweldo rason man nga nagahalalin ang mga kaupdanan sini.
Marso 1 tubtob 15 ang ulihi nga pagbyahe sang natungdan kag
bangud sa delay nga sweldo, indi ini makasustener sa iya pamilya ilabi na nga naga-board siya sa syudad.
Ginpahayag man sini nga nagbalik siya sa opisina agud kuhaon kuntani ang iya sweldo, apang nagpahayag ang talatapan nga may mga inadlaw nga nag-untat ang operasyon sang byahe bangud man sa kapareho nga sitwasyon sang kaupod man sini nga konduktor.
Bangud man sa amo nga sirkumstansya, isa ka libo na lamang ang mahatag sa iya sang kooperatiba sa tagsa ka kinsenas.
Nahibaluan nga yara sa P9,000 kada bulan ang sweldo nga mabaton kuntani sang mga konduker apang bangud sa amo nga sitwasyon, ginapahat-pahat na lang ang paghatag sang sweldo.
Gin-athag naman sang Iloilo City Alliance Operators and Drivers Transport Cooperative nga duha ka adlaw nga na-paralyze ang operasyon sang byahe bangud man sa mga kaangay nga reklamo sang mga konduktor.
Suno kay Rafael Prudente, General Manager sang ICAODTC, ini man ang rason kon ngaa may gap sa ila income nga nangin rason man sang delay nga sweldo.
Gin-ako man sang natungdan nga dako nga bagay sa ila nga bahin ang duha ka adlaw nga wala nakabyahe ilabi na nga nagabayad pa sila sang gatong kag maintenance sang modernized jeep.
