ILOILO CITY – Indi na kinahanglan nga mag-convene ang Kongreso agud talakayon ang Martial Law declaration ni Presidente Rodrigo Duterte kun wala sang magkuwestyon sini.
Ini ang panindugan ni Capiz 2nd District kag Deputy Speaker Fredinil Castro sa interview sang Bombo Radyo.
Suno sa mamalidha, mayorya sa Kongreso ang nagapabor sa deklarasyon sang Presidente nga ipaidalom sa Batas Militar ang Mindanao.
Kinahanglan lang suno kay Castro nga mag-convene kun may isa ka miyembro sang Kamara ukon Senado ang mag-file sang petisyon nga nagkuwestyon sa deklarasyon sang Martial Law.
Sa ti-on nga matabo ini, indi basta-basta suno sa mamalidha nga mabasura ang reklamo kag kinahanglan nga ini ang pungkuan agud botohan.
Nahibaluan nga ginauyatan na subong sang Kongreso ang Martial Law report nga ginsumite ni Presidente Duterte kun sa diin nakasaad ang mga rason sini sa pagdeklarar sang Batas Militar.