Magabalik na sa sessions ang Kamara kag Senado subong nga adlaw, Nobyembre 4, matapos ang isa ka bulan nga break.
Sa House of Representatives, target nga ipasar ang apat ka priority measures ni President Ferdinand Marcos, Jr. ukon ang mga nalista sa Legislative-Executive Development Advisory Council (LEDAC).
Lakip sa nabilin sa priority list amo ang Budget Modernization Bill kag ang National Defense Bill.
Natalana man nga aprubahan ang amendments sa Agrarian Reform Law kag Foreign Investors’ Long-Term Lease.
Antes nag-break ang Kongreso sang Septyembre 27, matandaan nga ginpasar sa third and final reading sa Kamara ang ginaduso nga P6.352-trillion national budget para sa 2025.
Ini nga budget bill amo naman ang numero uno nga prayoridad sang Senado suno kay Senate President Francis “Chiz” G. Escudero antes ang pag-break liwat sang Kongreso sa Disyembre 21.
Ang annual General Appropriations Bill ang ipaidalom sa finishing touches, plantsahon ang pila ka deperensya sa budget kag i-settle ang nagasumpakilay nga mga bersyon paagi sa bicameral conference committee sa tunga sang mga senador kag kongresista antes ang Christmas break.
