Gina-ekspektar ni Iloilo City Councilor Sheen Marie Mabilog nga ma-deliver ni Mayor Raisa Treñas subong nga adlaw, Oktubre 26 sa State of the City Address (SOCA) ang konkreto nga solusyon sa nagasaka nga presyo sang mga nagapanguna nga kinahanglanon kag preparasyon batok sa nagapadayon nga kakulang sang tubig.
Suno kay Mabilog, indi kinahanglan nga programa kag proyekto lamang ang ipresentar, kundi kinahanglan maathag kung paano mabuhinan ang nagabug-at nga galastuhan sang ordinaryo nga mga Ilonggo.
Ginpunto sang konsehal nga nagsaka na sa 7.8 percent ang inflation rate sang Hulyo 2026, halin sa 3.7 percent sang Hulyo 2025—halos doble sa sulod sang isa ka tuig.
Gani, ginapangita ni Mabilog ang klaro nga sabat kag lihok kung paano mabuligan ang mga pamilya nga nabudlayan sa pagbayad sang plete kag kuryente, kag sa pagbakal sang pagkaon.
Ginpabutyag pa niya ang iya pagkabalaka sa inflation kag sa posible nga epekto sang pagtaas sang real property tax (RPT) sa pangabuhi sang mga Ilonggo sang Hulyo 2025.
Dugang pa, ginpunto ni Mabilog ang kinahanglanon sang detalyado kag masaligan nga contingency plan batok sa posible nga kakulang sang suplay sang tubig bangud sang El Niño.
Ginkwestiyon ni Mabilog kung ano na ang mga preparasyon nga nahimo sang siyudad kag ano ang mga tikang nga ipatuman agud indi mabutang sa peligro ang suplay sang tubig sa mga barangay.
Para kay Mabilog, dapat ang SOCA indi lamang pagpresentar sang mga nahimo sang administrasyon, kundi paghatag sang direkta kag konkreto nga sabat sa mga problema nga adlaw-adlaw nga ginapas-an sang mga Ilonggo.
Text by: Cyrene A. Nasis
