ILOILO CITY – Wala napunggan ni Iloilo City Councilor Jojo Javellana nga magpabutyag sang kalain sang buot batok kay Public Safety and Transportation Management Office Head Jeck Conlu kadungan sang regular session sang Sangguniang Panlungsod.
Sa sesyon kaina sang aga, naghatag sang privilege speech si Javellana tuhoy sa iya kalain sang buot kasunod sang natabo nga pagdakop sang traffic auxiliary sa isa ka Barangay Tanod nga nagdul-ong sa isa ka pasyente sakay sa Barangay Tricycle Patrol.
Suno kay Javellana, matuod nga ginadumili-an ang pag-agi sang tricycle sa national road apang kun tani may yara sang konsiderasyon ilabi na kun may yara sang emerhensya.
Sang Mayo 27 suno kay Javellana, sakay sa Barangay Tricycle Patrol ang isa ka bata nga ginkagat sang tutoy kag idul-ong kun tani sang Barangay Tanod sang Nabitasan, La Paz sa animal bite center.
Apang sa baylo nga pahanugutan, gindakop sang traffic auxiliary ang Barangay Tanod bangud sa panindugan nga ‘Dura Lex Sed Lex’ ukon The law is harsh but it is the law.
Magluwas diri, ginpakigbahin man ni Javellana ang isa pa gid ka insidente nga nangin rason man kun nga-a nadismaya siya kay Conlu.
Tatlo ka semana ang nakaligad suno sa Konsehal, may driver nga nagpangayo sang bulig agud nga makuha ang na-impound nga tricycle.
Ginpahayag ni Javellana nga iya nga ginbuligan ang nasambit nga driver apang wala ginhatag ang tricycle bangud suno sa mga personnel nga nagaduty sa impounding area, wala sang mandu sa ila nga mahimo na ini nga ihatag.
Bangud sini, makapila ka bes niya nga gintawgan si Conlu para sa kaathagan apang wala gid nagasabat ang PSTMO head.
