Nagpangayo ang konseho sang Buenavista, Guimaras sang kopya sang power supply agreement sa tunga sang Guimaras Electric Cooperative (GUIMELCO) kag mga power suppliers sini.
Sa interview sang Bombo Radyo kay Buenavista, Guimaras Sangguniang Bayan Member Atty. Vincent De Asis, iya ginpahayag nga nagalaum ang konseho nga makakuha sang kopya sang kasugtanan agud maplastar kag maklarohan sila kon ngaa nagtaas ang electricity rate sa ila probinsya.
Suno kay De Asis, natingalahan sila nga notaryado ang dokumento sang agreement apang, ginadumulian sang GUILMELCO nga ipakita sa publiko.
Ginpahayag man sini nga sa subong, wala pa napasar ang resolusyon, apang ginatinghuwaan nga mapasar ini, ihatag man ukon indi sang GUIMELCO ang agreement.
Nahibaluan nga anay na nga ginrason sang GUIMELCO nga confidential ang power supply agreement nila sang power suppliers rason nga wala ini ginsapubliko.
