ILOILO CITY-Nagpasar ang Iloilo City Council sang resolusyon nga nagahingyo sa Department of Transportation nga pahanugutan nga makabyahe ang mga depampasahero nga jeep apisar nga indi pa miembro sang kooperatiba ukon korporasyon.
Sa interview sang Bombo Radyo kay Iloilo City Councilor Rommel Duron, chairman sang Committee on Transportation sa konseho, iya ginpahayag nga ang nasambit nga resolusyon ang nagatuyo nga buligan ang mga operators nga makabalik sa operasyon nga indi na kinahanglan nga mangin miembro sang kooperatiba ukon korporasyon nga amo ang gina-require sang Land Transportation Franchising and Regulatory Board antes makabyahe.
Suno kay Duron,kuntani maghatag sang konsiderasyon ang nasambit nga ahensya sa mga operators bangud mabug-at ang nasambit nga requirement ilabi na nga pila ka bulan nga nag-untat ang byahe bangud sa coronavirus disease 2019 pandemic.
Nahibaluan nga kinahanglan nga magbayad sang operator sang P5,000 para sa membership sa kooperatiba kag capital build up nga indi magnubo sa P20,000 antes makabyahe.
Suno pa sa opisyal, sa subong, sa kabilugan nga tatlo ka libo nga operators sa syudad, 28 lang ang naka-comply sa requirement nga amo lang subong ang nagabyahe sa syudad sang Iloilo.
Sa subong, suno kay Duron, tinguhaan nga mapasa ang nasambit nga resolusyon sa Department of Transportation Central Office pinaagi sa Regional Office sang Land Transportation Franchising and Regulatory Board.
