ILOILO CITY — Nakalab-ot na sa Iloilo City Council ang konstruksyon sang Department of Works and Highways (DPWH) sang seawall sa Barangay Rizal Pala-Pala 1, 2, kag Barangay Estanzuela, Iloilo City.
Sa interview sang Bombo Radyo kay Iloilo City Councilor Johnny Young, Chairman on Engineering, Construction and Public Works, iya ginpahayag nga nagdagdag na sila sang resolusyon agud untatan anay ang pagpatukod sang seawall samtang wala pa sila nakapasa sang mga kulang nga requirements.
Suno kay Young, wala sila nakakuha sang permit halin sa City Government, City Environment and Natural Resources Office, Philippine Ports Authority, kag Philippine Reclamation Authority agud magpatukod sang nasambit nga proyekto.
Ginpahayag man sini nga kinahanglan anay mag-agi ang proyekto sa mga nasambit nga ahensya agud masiguro nga wala ini sang may ginalapas nga layi.
Natukiban man nga wala nakakuha sang clearance halin sa mga barangay nga nasakopan sang pagpatukod sang 150 meters nga seawall.
Nagalaum naman ang natungdan nga ma-comply sang DPWH ang mga requirements agud nga mapadayon na ang pagtukod sang proyekto.
