Posible mapanabat indi lamang mga nagabaligya sang karne nga halin sa backyard slaughter kundi pati ang mga konsumidor nga nagabakal sini kasunod sa ginaduso nga ordinansa sang Iloilo City Government batok sa ilegal nga pag-ihaw sang kasapatan.
Ang “hot meat” amo ang mga produkto sang karne nga naghalin sa unregistered ukon unaccredited nga mga slaughterhouse kag wala nakaagi sa kinahanglaon nga government health inspections.
Suno kay Dr. Fernando Abulencia, Iloilo City Veterinarian, ini ang ginatutukan ni City Councilor Mandrei Malabor upod sa City Administrator, kag City Veterinarian’s Office agud mapanubo ang padayon nga paglapas sa mga regulasyon sa pag-ihaw sang sapat sa siyudad.
Pahayag niya, bisan may yara na sang mga operation kag confiscation sang karne, nagabalik-balik sa gihapon ang mga paglapas bangud wala sang klaro nga penalties ukon probisyon ang existing nga Executive Order.
Ginpahayag ni Dr. Abulencia nga kun maduso ang ordinansa, posible maapektuhan ang mga naga-ihaw sang baboy sa backyard kag sa mga riverbank bangud isa sa mga ginakabalak-an ang polusyon sa Iloilo River nga tuga sang mga ilegal nga aktibidad sa pag-ihaw.
Ginpakigbahin man sini nga ang Local Economic and Enterprise Office (LEEO) ang nagapanguna sang operasyon kag administrasyon sang slaughterhouse, samtang ang City Veterinarian’s Office naman ang nagatutok sa regulatory functions pareho sang surveillance, inspection kag monitoring.
Base sa datos sang LEEO, naglab-ot sa 66,615 ka baboy, 773 ka baka kag 5,369 ka karbaw ang naihaw halin Enero tubtob Oktubre 13 subong nga tuig.
Dugang pa ni Dr. Abulencia, nagakaubos ang manpower sang gobyerno sa padayon nga pag-inspeksyon, ilabi na sa mga meat vendors sa higad sang dalan.
Bangud sini ginapangabay ang publiko nga mag-report sa City Veterinarian’s Office ukon sa City Environment and Natural Resources Office (CENRO) kun may makita nga nagaihaw sang kasapatan sa backyard ukon sa higad sang suba.
Magapatigayon man sang joint inspections sa mga balaligyaan sang karne sa Iloilo City ang National Meat Inspection Service (NMIS) kag Iloilo City Government agud masiguro nga nagasunod ang mga vendors sa nagakaigo nga meat handling practices kag malikawan ang pagbaligya sang double dead nga karne
Kabahin ini sang 33rd Meat Safety Consciousness Week nga pangunahan sang NMIS halin Oktubre 19 tubtob 23, 2026.
