Maga-imbestigar kag magapatigayon sang site inspection ang Iloilo City Council sa bubon sa Brgy. Ingore, Lapaz, Iloilo City sa diin nag-inom ang duha ka bata kag napatay.
Sa interview sang Bombo Radyo kay Iloilo City Councilor Allan Zaldivar, chairman sang Committee on Health sa Sangguniang Panlunsod, iya ginpahayag nga magapatigayon sila sang pagsinapol sang mga barangay officials agud masolusyunan ang problema sa mahigko nga tubig sa ila lugar.
Suno kay Zaldivar, magapadala man siya sang sulat sa City Environment & Natural Resources Office (CENRO) agud magpatigayon sang inspeksyon sa bubon sa lugar.
Gin-ako man sang konsehal nga wala pa sang ordinansa ang syudad sang Iloilo kaangot sa indi pag-inom sa mga bubon ukon sa anuman nga ginakuhaan sang tubig nga indi safe imnon.
Matandaan nga acute gastroenteritis ang cause of death sang duha ka mga kabataan nga pareho nga naga-edad sang tatlo ka tuig.
Ang mga ini ang nakainom sang tubig sa bubon nga ginapahayag kontaminado.
Ginsiraduhan naman sang City Health Office ang bubon agud ma imbestigaran ang amo nga insidente.
