Gin-ako sang presidente sang Centerways Construction and Development Inc. nga si Lawrence Lubiano nga nagdonar siya sang P30-million kay Senate President Francis “Chiz” Escudero para sa iya kampanya sang 2022 elections.
Apang panindugan sang kontraktor, halin sa iya bulsa ang amo nga kuwarta kag indi halin sa kontrata sini sa gobyerno.
Suno kay Lubiano, naghatag siya sang donasyon kay Chiz bilang “personal individual”, apang magluwas dira, wala na siya sang ginhatagan pa.
“Your honor, personally ko po donation or nag-donate po ako kay Senator Chiz, yung P30 million. Hindi po galing sa company ‘yun, galing po yun sa akin as a personal individual,” sabat sini kay Rep. Chel Diokno sa tri-comm hearing sa Kamara.
Ang Centerways Construction ang isa sa 15 ka mga kumpaniya nga ginpanglawag sang Malacañang nga naka-secure sang government flood control projects.
Una naman nga gin-ako ni Chiz nga mag-abyan sila ni Lubiano, apang nagpanginwala ini nga nagpahilabot siya sa government business and contracts sang amo nga kontraktor.
Sa House hearing, gin-ako man ni Lubiano nga duha sa iya mga utod ang elected officials sa Sorsogon, apang nagpanginwala siya nga may business partners siya sa gobyerno.#
