ILOILO CITY – Magapasa sang petition ukon manifestation si Local Civil Registry Head Mr. Juncae Manikan sa National Bureau of Investigation agud nga balabagan ang pagpasa sang dukomento tuhoy sa personal data and information may kaangtanan sa ginapahayag 180 ka peke nga kasal nga ginrehistro.
Sa interview sang Bombo Radyo kay Atty. Raleigh Silvino Manikan, legal counsel ni Mr. Juncae Manikan, iya ginpahayag nga makabig nga paglapas sa Data Privacy Act kun tumanon sang iya kliyente ang ginahingyo sang National Bureau of Investigation.
Suno kay Atty. Manikan, makabig nga chismis ukon huring-huring ang reklamo tuhoy sa 180 ka mga peke nga kasal ilabi pa nga ang written complaint ang wala napirmahan sang tagreklamo nga isa ka preso suno sa City Legal Office.
Ginpahayag ni Atty. Manikan nga mahimo nga ginpaguwa ang nasambit nga kontrobersiya agud nga gub-on lang ang Local Civil Registrar.
Ginakwestyon ni Atty. Manikan kun nga-a ginpatihan sang City Legal Office kag sang National Bureau of Investigation ang unsigned written complaint.
Sa pagkamatuod suno sa abogado, indi nila kilala ang tagreklamo kag indi malayo nga ginhimu-himo lang ang pangalanan.
Santo sa layi, wala ginapahanugutan ang peke nga kasal kag ministerial lamang ang katungdanan sang Local Civil Registry.
