ILOILO CITY — Nag-aregluhanay na ang Local Government Unit (LGU) sang Leon kag ang grupo sang photographers nga nagpatigayon sang nude photoshoot sa Bucari, Leon, Iloilo.
Ini matapos nga personal nga nagpadulong ang grupo kay Leon Mayor Rolito Cajilig agud magpa-athag sang ila nga bahin kag magpangayo sang pasaylo.
Suno kay Mayor Cajilig, nangin maayo ang ila pag-istoryahany kag nag-intindihanay ang magtimbang nga bahin sa tagsa nila ka mga punto.
Nakasugtan naman sa amu nga pag-istoryahanay nga kinahanglan nga magpadala ang grupo sang letter of apology sa Department of Tourism, kay 2nd District Cong. Arcadio Gorriceta, Gov. Arthur Defensor Sr. kag sa Sangguniang Bayan sang Leon.
Magluwas sini, mangin partner man ang mga ini sa pag-promote sang Bucari, Leon nga ginakabig ‘Little Baguio’ sang Iloilo.
Ginakalipay man sang alkalde nga naklaro na ang amu nga kontrobersiya kag indi naman ini magpasaka pa sang kaso.
Apisar sini,gin-athag ni Mayor Cajilig nga indi sa gihapon magpahanugot ang LGU sang Leon nga may magpatigayon sang nude photoshoot sa Bucari, Leon.
Daw kaangay naman nga nabunutan sang tunok ang grupo sang mga photographers nga nagpatigayon sang nude photoshoot sa Bucari, Leon matapos nga ginbaton na sang Local Government Unit sang Leon ang ila pagpangayo sang pasaylo.
Suno sa photographer nga si Steve Quiatchon, sa ila personal nga pagpadulong kay Mayor Rolito Cajilig, gin-welcome gid sila kag gin-intindi ang ila nga bahin.
Willing man ang ila nga grupo nga mag-comply sa ginapangayo sang mga ini nga pagpasa sang letter of apology sa Department of Tourism, kay 2nd district Cong. Arcadio Gorriceta, Gov. Arthur Defensor Sr. kag sa Sangguniang Bayan sang Leon.
Magluwas sini, magabulig man sila sa banwa sa pag-promote sang Bucari, sa diin ila naman ini nga ginahimo sa kada nga may event sa lugar apang pagadugangan pa gid nila.