ILOILO CITY – Nag-apelar ang aktres nga si Ella Cruz nga indi pagdalahigon ang iya pamilya sa kontrobersiya nga iya nga ginakaulamiran.
Ang 25 anyos nga si Ella ang gin-ulan sang pagpakamalaot matapos nga nagbuya sang pahayag may kaangtanan sa pelikula nga iya nga ginahimo nga amo ang Maid in Malacañang.
Kung madumduman, ginpahayag ni Ella nga ang history ang daw kaangay sang isa ka tsismis, may filter, may dugang gani indi na mahibaluan kun ano gid man ang matuod.
Bangud sini, gin-ulan sang pakamalaot si Ella.
Nasakitan si Ella bangud gindalahig ang iya amay nga si Tantan Cruz.
Nahibaluan nga nagpadalagan bilang alkalde sang Angat, Bulacan ang iya amay apang napyerde ini bangud nga 731 gid lamang ang boto nga nakuha sini.
Ginsabat ni Ella ang isa ka post kun sa diin, ginpahanungod sa kapyerdehan sang iya amay sa eleksyon matapos nga gin-apinan ang anak sa mga bashers.
Suno kay Ella, i-bash lamang siya apang indi pagdalahigon ang iya pamilya kag nagpangayo sang gamay nga kaluoy nagikan sa netizens.
Si Ella Cruz ang magadala sang papel ni Irene Marcos, ang arts patron kag ikatatlo nga anak ni late President Ferdinand Marcos Sr.
Nahibaluan nga una na nga naka-esperyensya sang bashing si Ella sang siya ang high school pa lamang.
