ILOILO – Leksyon para sa banwa sang Janiuay ang kontrobersyal nga ‘crowd gathering’ ukon pagtilipon ang mga tawo sang nag-abot ang gambling lord nga si Atong Ang kag ang aktres nga si Gretchen Barreto sang tinalikdan nga Domingo.
Sa interview sang Bombo Radyo kay Mayor Bienvenido Margarico, iya ginpahayag nga matuod ang report nga nagdugok ang mga tawo sang nag-abot sanday Ang kag Barreto sa isa ka resort sa amo nga banwa rason nga wala napatuman sang maayo ang mga minimum health protocols.
Suno kay Margarico, antes nagdiretso sa resort, nag-courtesy call pa ang duha sa iya nga opisina kag pagkatapos, wala na siya nakaupod kanday Ang kag Barreto sa ila masunod nga mga aktibidad lakip na ang pag-inspect sa isa ka bulangan.
Nagdepensa man ang alkalde nga wala man kuntani gin-anunsyar ang pag-abot sang duha agud malikawan ang pagdugok sang publiko.
Sang ginpamangkot kun posible paatubangon sa nagakaigu nga kaso ang organizers sang resort visit nanday Ang kag Barreto, ginpahayag ni Margarico nga ‘shortcoming’ ini nga nagaserbe man nga leksyon sa tanan nga mga pumuluyo sang banwa.
