ILOILO CITY- Nadeliver na ang kontrobersyal nga mga heavy equipment nga gin-procure sang Local Government Unit sang Dumangas, Iloilo.
Sa interview sang Bombo Radyo kay Dumangas, Iloilo Mayor Ronaldo Onal Golez, iya ginpahayag nga matapos nag-abot ini nga mga heavy equipment, ginpresentar sa mga natungdan nga ahensya ang mga dokumento sang mga equipment.
Suno kay Golez, gincheck man sang local inspection team ang nasambit nga mga equipment kag nagsibo ang tanan nga specifications sa presyo sang mga equipment sang kompaniya nga AVANTRAC.
Pahayag ni Golez, ginpatalang lang sang iban nga sangguniang bayan members ang publiko paagi sa pagpagwa sang sala nga specifications agud pagwaon nga overpriced ang nasambit nga mga equipment.
Matandaan nga ginbuyagyag ni Sangguniang Bayan Member Ian Dolendo nga kon sumahon ang presyo sang ginprocure nga equipment sa kompaniya nga AVANTRAC nga nakabase sa Cebu nga nagdaog sa bidding, nagalab-ot tanan P45M ang balor sang duha ka brand new 6-wheeler dump truck, isa ka brand new nga 6-wheeler garbage compactor, isa ka brand new nga 4 by 4 backhoe loader, isa ka brand new nga 6-wheeler mini dump truck, kag isa ka brand new nga generator set.
Apang kon presyo naman sang iban nga kompaniya nga HOWO/HOMAN kag SINOTRUK/LONKING ang basehan, nagalab-ot lang ini sa kapin P11.5M.
Dugang pa sang natungdan, ang Commission on Audit lang ang makahusga kon may natabo gid man nga overpricing sa ginpang-procure nga mga equipment.
