Madugay na nga may mga reklamo batok sa kontrobersyal nga principal sa Laua-an, Antique.
Ang principal amo si Venus Divinia Nietes nga nangin sentro sang eskandalo matapos ginpauba sa mga estudyante ang toga sa ila End-of-School-Year (EOSY) rites sang Abril 15 sa Col. Ruperto Abellon National School (CRANS) sa Laua-an, Antique.
Sang Septyembre 2023, sang siya ang principal sang Laua-an National High School, masobra 500 nga mga estudyante kag kapin 20 ka mga manunudlo ang nagpatigayon sang hublag-protesta sa atubang mismo sang agud ipabutyag ang ila disgusto sa pagdumala ni Nietes bangud sa ginaalegar pagpang-bully, pagpamahog kag pag-abuso sa iya posisyon.
Matandaan nga mismo si Laua-an, Antique Mayor Aser Baladjay ang nagpanawagan sa Department of Education nga pangitaan na sang paagi agud nga ma-transfer ang kontrobersyal nga si Nietes.
Suno pa kay Baladjay, antes gin-assign sa iya banwa si Nietes, nangin magamo man ang sitwasyon sa duha ka mga eskwelahan nga ginhalinan sang principal.
Sa Culasi kag sa Tobias Fornier, ginkasuhan man si Nietes kag may petition nga pahalinon nagikan sa mga ginikanan kag mga manunudlo.
Dugang niya, daw kaangay nga wala na man sang local government unit nga handa nga magbaton kay Nietes bangud sa iya batasan.
