ILOILO CITY – Ipaidalom sa summary hearing ang kontrobersyal nga si Police Lt. Col. Jovie Espenido bangud sa paglapas sa gag order nga ginhatag ni Philippine National Police Chief Police General Archie Gamboa.
Ini ang ginkumpirma ni Police Regional Office 6 Police Brigadier General Rene Pamuspusan kasunod sang resulta sang pre-charge investigation sang Regional Investigation and Detective Management Division nga may yara sang probable cause kag dapat nga pasakaan sang kaso administratibo si Espenido.
Sakop sang gag order ni Gamboa suno kay Pamuspusan ang 357 nga pulis lakip na si Espenido nga nalakip sa narcolist.
Nahibalu-an nga apisar nga may yara sang gag order, nagpatigayon sa gihapon sang press conference si Espenido sa Bacolod kag sa Kampo Delgado.
Pagpangapin lamang sa kaugalingon ang katuyu-an ni Espenido sa pagpatigayon sang press conference apisar sang gag order.
Santo sa sabat ni Espenido kay Pamuspusan, nalimtan niya ang tuhoy sa gag order bangud nga nagapangibabaw ang balatyagon nga dapat niya pangapinan ang iya kaugalingon.
Sa subong suno sa Regional Director, yara sa gihapon sa Regional Personnel Holding and Accounting Unit si Espenido samtang napasa na sa Kampo Crame ang resulta sang adjudication process.
