Nakumpirma nga may aktuwal nga proyekto sa distrito sang Lapuz, Iloilo City ang kontrobersyal nga St. Timothy Construction, nga nalakip sa top 15 contractors sang mga flood control projects sa pungsod.
Ini amo ang Construction of Flood Mitigation Structure – Section 1, Lapuz, Iloilo City nga may programmed amount nga ₱150 million.
Sa interview sang Bombo Radyo kay Kagawad Ricardo Diño sang Brgy. Bo Obrero, ginpahayag niya nga dako gid ang improvement sa lugar bangud sang proyekto.
Suno sa iya, ginpanami ang palibot, may suga na, may solar-powered nga kagamitan, kag may klaro nga benepisyo nga makuha sang pumuluyo.
Ginklaro man niya nga halos isa ka tuig na ang konstruksyon, apang wala siya nakakita sang proposal ukon time frame sang proyekto, halin sa pagsugod tubtob sa pagtakop sini.
Gin-ako man ni Diño nga bisan pa may ginahambal nga anomalya sa national level, ginapasalamatan niya gihapon ang proyekto bangud ang pumuluyo ang makaangkon sang benepisyo.
Ginpunto niya nga ang mga isyu sa national level dapat sabton sang kompaniya sa insakto nga proseso.
