Nagpanawagan ang Igbaras Municipal Police Station sa mga residente sa banwa nga buligan man ang otoridad sa pagpapas sa rebelde nga grupo.
Ini paagi sa pag-report sang mga aktibidad sang mga katapo sang New People’s Army kaangay sang pagpangilkil nga amo ang ginapahayag nga ila man ginhimo antes ang engkwentro batok sa militar sang Sabado sa Sitio Gibasya, Barangay Tigbanaba, Igbaras.
Sa interview sang Bombo Radyo kay Pol.Lt. Rodel Pasion, hepe sang Igbaras Municipal Police Station, iya ginpahayag nga indi dapat matahap ang mga tawo sa paghatag sang impormasyon sa police station bangud kabigon man ini nga confidential kag indi pag-i-bulgar ang identity sang nag-report.
Mahimo man suno kay Pasion nga ipaagi ang report sa barangay officials.
Sa nagluntad nga engkwentro sang Sabado, ginapahayag 10 ka mga katapo sang rebelde ang involved kag isa ang patay nga ginkilala kay Domingo Costas alias Evan ukon Ivan, ginapahayag nga residente sag Barangay Dalije, Miagao, kag myembro sang Team 1, Squad 1, Suyak Platoon, Southern Front Komiteng Rehiyon Panay nga ginapamunuan ni Jun Capio alias Ronron.
Wala naman sang napilasan sa tropa sang militar.
