Nagpasugot ang korte sa Tarlac nga paatubangon sa imbestigasyon sang Senado si dismissed Bamban, Tarlac Mayor Alice Guo sa Lunes, Septyembre 9.
Sa order nga ginpaguwa kahapon, Septyembre 6, ginpahayag ni Capas, Tarlac Regional Trial Court Branch 109 Presiding Judge Sarah Vedaña-Delos Santos nga gina-grant sini ang request ni Senator Risa Hontiveros nga tugutan si Guo nga magtambong sa hearing sang upper chamber sang Kongreso.
Ang amo nga korte nga naga-uyat sang kaso na graft batok kay Guo ang nagmandu man sa Philippine National Police nga dal-on si Guo sa Senate bangud ang former mayor ang naka-detain subong sa Custodial Center sang pulis sa Camp Crame sa Quezon City.
Suno sa korte, tuman ka importante ang inquiry in aid of legislation” sang Senado rason nga gin-grant sini ang request ni Hontiveros.
“Given the critical importance of the ongoing inquiry in aid of legislation, the Court grants the Senator’s request,” kabahin sa nakasaad sa order. “Wherefore, the accused Alice Guo alias ‘Guo Hua Ping’ is allowed to attend the scheduled public hearing mentioned above provided that strict protocol be observed.
Matandaan nga kahapon sang aga, Septyembre 6, sang nagkadto si Guo sa korte sa Tarlac apang wala ini nagpyansa sa duha ka kaso nga graft.
Magalab-ot kuntani ang piyansa sa P180,000 apang suno sa iya legal team, mas nabatyagan ni Guo nga safe siya sa Philippine National Police (PNP) custody gani nga magapabilin siya sa Camp Crame.
Antes sina, may yara na kuntani sang arrest order ang Senado batok kay Guo apang indi na ini mapatinir sa detention center sang Senado samtang nga indi ini temporary nga mahilway sa kustodiya sang pulis.
Bangud sang lihok sang dismissed mayor nga indi magpiyansa, mangin kumplikado na ang proseso para sa Senado bangud kinahanglan gid sini ang approval sang korte sa kada tion nga kinahanglan sini paatubangon si Guo sa mga hearing.
Una naman nga nagpaguwa sang statement si Sen. Hontiveros kun sa diin ginpanindugan sini nga dapat ipaidalom sa Senate custody si Guo bangud sila ang una nga nakadagdag sang arrest warrant batok sa anay alkalde. Ginkwestyon man sini kun ngaa korte sa Tarlac ang nag-isyu sang arrest warrant bangud klaro suno sa iya sa Supreme Court case sang Binay v. Sandiganbayan nga ang criminal cases batok sa municipal mayors ang nahulog sa exclusive jurisdiction sang Sandiganbayan.
“Ngayon kung si Guo Hua Ping ay di mag-piyansya, ibig sabihin mas gusto pa niya makulong sa PNP kaysa sa Senate. We need to ask why. Why does she want to be in a jail more than in the Senate detention facility?” suno kay Hontiveros.
Nahibaluan nga magluwas sa kaso nga graft, may iban pa nga reklamo nga ginaatubang si Guo lakip ang qualified human trafficking, tax evasion, kag money laundering.
1:10 kahapon sang kaagahon, Septyembre 6, sang ginbalik si Guo sa Pilipinas matapos nadakpan sa Tangerang City, Indonesia.##
