Nagpasugot ang korte nga patambungon si dismissed Bamban, Tarlac mayor Alice Guo sa hearing sang Senado sa Oktubre 8 bilang kabahin sang imbestigasyon batok sa iligal nga Philippine Offshore Gaming Operators (POGOs).
Gin-grant ni Pasig Regional Trial Court (RTC) Branch 167 Presiding Judge Annielyn Medes-Cabelis ang request sang Senate committee on women, children, family relations, and gender equality sa presensya ni Guo sa hearing bangud ang Senado suno sa korte ang isa ka “co-equal branch” sang judiciary kag “in aid of legislation” ang subject inquiry.
Magluwas kay Guo, ginpasugtan man sang korte nga makatambong sanday Jamielyn Santos Cruz, Thelma Barrogo Laranan, Rita Sapnu Yturralde, Rowena Evangelista, kag Rachelle Joan Malonzo Carreon kasunod man sang request sang Senate panel.
Suno kay committee chair Senator Risa Hontiveros, gin-request ang presensya sang lima ka iban pa bangud nalista sila nga co-incorporators sa POGO hub sa Bamban.
Matandaan nga ang Biyernes, nag-plead sang NOT GUILTY si Guo sa kaso nga qualified human trafficking sa korte sa Pasig.
Naangot ini sa raid sa POGO hub sa Bamban sang Hunyo kun sa diin 800 ka mga Pilipino kag foreigners ang na-rescue sang otoridad.
Nahibaluan nga sa kabug-usan, nagapangatubang ang dismissed mayor sang mga kaso nga graft, qualified human trafficking, money laundering, kag tax evasion kag yara subong sa Pasig City Jail.
