Ginapasabat sang Korte Suprema ang pila ka mga opisyal sang gobyerno kaangot sa mga petisyon para sa writ of habeas corpus nga gin-file sang mga mag-utod nga Duterte kasunod sang pag-aresto kay former President Rodrigo Duterte.
Suno sa Korte, nag-desisyon man ang en banc nga i-consolidate ang petitions for habeas corpus nga separado nga gin-file sang mga kabataan sang former president.
Ang nagpasaka sini sa Supreme Court amo sanday Davao City Representative Paolo “Pulong” Duterte, Davao City Mayor Sebastian “Baste” Duterte, kag Veronica “Kitty” Duterte.
Ang pinaka-ulihi nga nagdugang sang iya petisyon amo si Pulong nga nag-file para sa habeas corpus, certiorari and prohibition, kag nagapangayo man sang temporary restraining order (TRO).
Naghingyo man ini sa Supreme Court nga manduan ang Pilipinas nga untaton ang pagkooperar sa International Criminal Police Organization (Interpol).
Base sa kongresista, “unlawfully arrested and illegally detained” ang status sang iya amay.
Ang respondents naman nga ginhatagan sang 24 oras agud makasabat kun ngaa indi dapat pag-igrant ang hingyo sang petitioners amo sanday Executive Secretary Lucas Bersamin, Justice Secretary Jesus Crispin Remulla, Interior Secretary Juanito Victor Remulla, PNP chief Police General Rommel Marbil, kag Criminal Investigation and Detection Group chief Police Major General Nicolas Torre III.
Ginpasaka sang mga kabataan nga Duterte ang petisyon matapos nga gindakop ang ila amay sang Martes sang aga sa gahum sang arrest warrant nga gin-isyu sang ICC kag gindala sa The Hague.#
