Ginmanduan sang Korte Suprema ang Senado nga magpasa sang kumento sa petition nga nagahingyo sa ila nga mag-akto gilayon sa impeachment trial batok kay Vice President Sara Duterte.
Ang petition ang gin-file ni former special counsel of the Presidential Commission on Good Government (PCGG) Atty. Catalino Generillo.
Sa iya 22 ka pahina nga petition, ginsiling sini nga ang Konstitusyon ang wala nagapahanugot sa Senado nga mag-atrasar sang ila ulubrahon kun recess ukon session break.
Pahayag sini, may constitutional duty ang Senado nga indi sini mapalagyuhan kag ini amo ang pag-tingob na sa labing-madali nga tion bilang isa ka impeachment court kun mabaton na ang Articles of Impeachment halin sa Kamara.
May ginpadala man nga kopya kay Senate President Francis “Chiz” Escudero kag sa Office of the Solicitor General.
Subong nga adlaw, nag-file man sang petition sa Korte Suprema ang mga abogado halin sa Mindanao agud pauntaton ang impeachment proceedings batok kay Duterte.
Ini ang ginpangunahan ni Atty. Israelito Torreon, legal counsel ni Pastor Apollo Quiboloy kag anay Land Transportation Franchising and Regulatory Board (LTFRB) Chairman Atty. Martin Delgra III.
Magluwas sa ila, nagpirma man sa petisyon sanday Atty. James Reserva kag Atty. Hillary Olga Reserva kag iban pa nga mga abogado halin sa Davao kag mga suppporters ni Duterte.
Suno sa mga petisyoner, may yara sang pagpang-abuso sa gahom sang House of Representatives sa impeachment case batok sa bise presidente.
Ginakabig man sang mga abogado nga depektibo kag kwestyonable ang ginpasaka nga reklamo.
