ILOILO CITY – Nagnubo sang 65.92% ang krimen sa Western Visayas samtang ginapatuman ang Enhanced Community Quarantine.
Sa interview sang Bombo Radyo kay Pol. Lt. Col. Gibert Gorero, acting spokesperson sang Police Regional Office 6 iya ginpahayag nga base sa ila nga record, humalin sa 628 nagnubo sa 214 ang mga kaso nga ila na narecod samtang ginapatuman ang Enhanced Community Quarantine kun ipaanggid sang gintalikdan nga tuig.
Suno kay Gorero, dako ang nangin bulig sang pagpatuman sang Enhanced Community Quarantine sa pagnubo sang krimen bangud man sa presensya sang mga kapulisan sa mga quarantine checkpoints.
Santo sa pahayag sang natungdan, humalin sang Marso 17, 2020 tubtob Mayo 10, 2020 nagnubo sang 414 ang mga focus crimes sa Western Visayas nga ginalakipan sang muder, homicide, physical injuries, rape, robbery, theft kag carnapping.
Nagpanugyan man ang Police Regional Office 6 sa mga pumuluyo nga maghalong sa gihapon bangud kadungan sang paglakip sa syudad kag probinsya sang Iloilo sa ginakabig Low Risk Areas posible man nga liwat nga magtaas ang krimen bangud may yara na sang mangin paghulag sa mga tawo.
