May isa ka tumalagsahon nga istorya ang isa ka criminal nga indi gid luyag magtinir sa presuhan apisar nga nakasala siya sa layi.
Istorya ini ni Xiao didto sa Hubei Province sa China.
Sang Mayo 22,2024, nagbaisay sila sang iya nga kasilingan kag bangud nga naimpito siya, ginhakwat sini ang pala kag ginlampos sa ulo sang iya kontra nga rason sang kamatayon sini.
Bangud nakahibalo siya nga mapreso siya kag nahadlok man siya sa death penalty,gilayon ini nga nagpalagyo kag ginbayaan ang iya asawa kag 11-anyos nga bata.
Nagkadto siya sa kabukiran sang Anxi County sa Fujian Province kun sa diin nagbaligya siya sang mga basura agud nga mabuhi.
Para nga indi man makalkal ang iya nga nakaligad sa kabuhi, nagpakuno-kuno siya nga apa kag bungol sa sulod sang 20 ka tuig!
Nagayuhom-yuhom lamang ini sa tion nga may tawo kag wala gid siya nagkontak sa iya pamilya bisan isa ka bes.
Apang sang nagligad lamang nga bulan, may nakaaway ini nga isa ka tumandok sa lugar kag gindala siya sa police station.
Ginpaguwa man siya gilayon apang naglapta na ang iya pictures sa national database kag nakit-an sang pulis nga nagasanto ini sa isa ka wanted nga criminal.
Gilayon nga nag-follow up ang pulis kag nag-ako si Xiao nga residente siya sang Xiangcheng District sa Xianyang.
Wala na ini sang nahimo kag gintuad na lamang sa pulis nga 20 ka tuig na siya nga nagapugong nga makahambal agud indi siya maaresto, kag sa sini nga mga tinion,halos daw mabuang na ini.
Gindala si Xiao sa iya nadak-an nga lugar; ginpathag sini kun paano sini napatay ang iya kasilingan kag subong yara na ini sa presuhan.
