Nagmahal ang presyo sang bulak subong nga ginaselebrar ang Valentine s Day.
Ini bangud kalabanan sa baligya subong nga mga bulak ang imported kag limitado ang suplay sang lokal nga produkto.
Sa interview sang Bombo Radyo kay Noevie Alaban, isa ka flower vendor sa Corner Rizal Street, Iloilo City Proper, iya ginpahayag nga nagligad nga tuig, ang isa ka dosena nga bulak ang nagabalor sang P1,000, apang subong nga tuig, tunga na lang sa dosena ang mabakal sa isa ka libo ka pesos.
Dugang pa sini, madamo ang nagpamakal sang bulak, apang kulang ang lokal nga suplay gani napilitan ang iban nga magkuha sang stock halin sa iban nga pungsod, lakip na sa China.
Bisan pa sang pagsaka sang presyo, padayon ang pagkadto sang mga nagapamakal nga nagapangita sang bulak agud ihatag sa ila mga pinalangga sa kabuhi.
Sa pihak nga bahin, sa interview naman sang Bombo Radyo kay Rodrigo Butiga, isa ka driver, iya ginpahayag nga ginpili na lamang nila nga magselebrar sa sulod sang ila balay kaupod ang pamilya bangud sa kabudlay sang kabuhi subong.
Imbes nga magbakal sang bulak, mas ginpili na lang sini nga bugas ang baklon bilang mas prayoridad nga kinahanglanon sa pang-adlaw-adlaw nga tanan.
Suno pa sa iya nga manami man ang makabaton sang bulak apang mas kinahanglan nila nga makakaon gane bugas na lang ang gin-prayoridad.
